آخر الأخبار
الرئيسية / ع الزراعية / الشكوى لغير الله مذلة!

الشكوى لغير الله مذلة!

بقلم: د.مدحت مراد

تعليقا على ما كتبته الزميلة العزيزة د.هويدا السيد، عن ما بدا من الحاج العربى توشيبا من رغبته فى مساعدة اسرة المغفور له بإذن الله د احمد ابرهيم رحمه الله أود أن أقول لك د.هويدا .. ها نفضل نتعرض للمهانة طول ما مركز البحوث الزراعية مالوش اصحاب! طول ما كل وزير زراعة بييجى مش حاسس باهمية المركز ودوره الدستورى ومسئوليته عن حل مشاكل الزراعة فى مصر .. والمصيبة أنه بحكم تبعية المركز لوزير الزراعة هو رئيس مجلس الإدارة المنوط به رعايتنا وحل مشاكلنا ورفع صوتنا للمسئولين فى الدولة .. ولم وللأسف لن يحدث هذا!

فمنذ أيام د.يوسف والى – سامحه الله وشفاه وعفاه – كل وزير جاء من أساتذة الجامعة كل همه وأول قراراته انتم ماتكتبوش استاذ دكتور!، كأن الشهادات اللى معانا وحصلنا عليها بالجهد والمعاناة والصرف عليها من مرتباتنا ورق بفرة ! رغم إن إحنا والجامعة كادر واحد!.

عمرنا ما شفنا وزير و قف معانا أو حس بأهميتنا .. هاتيلى وزير واحد عمل حاجة كويسة لينا .. واظن قضية الجودة اللى كسبنا أحكامها بصفة نهائية وتنفذ بالقوة الجبرية نموذج حى لاهدار حقوقنا .. اللى ما فيه وزير حاول يجيب حقنا .. احنا عمالين نتساقط واسرنا تتبهدل وتواجه ظروف صعبة بعد مانموت وماشفناش وزير واحد حس بينا .. حتى إدارات المركز المتعاقبة ولا هى هنا! ويكفىنا عدم صرف بدل 78% بانتظام .. وصدقينى يا د. هويدا طول ما احنا شراذم هايتعمل فينا اكتر من كده .. وانا أسف اقولك .. د.احمد ربنا يرحمه لو كان رقاصة والا لاعب كرة صايع ولا ممثل بلطجى كان بقى اسطورة!، واتعالج على نفقة الدولة. احنا بقالنا أكتر من اسبوع قلبنا واجعنا وصوتنا اتنبح .. سمعت حد من المسئولين عنا عبرنا أو رد أو حد كتب كلمة تعزية! اقولك حاجة تحرق دمك أكتر؟! فيه جهات فى الدولة بيتصرف ليها بدل عدوى ولا علاقة ليهم على الإطلاق بمسببات العدوى!! بس صوتهم مسموع .. وكم بك يامصر من المضحكات كالبكا!

إذا كنا بنتوجه للحاج العربى بالشكر والامتنان على شهامته و إنسانيته ففى نفس الوقت بنقوله ربنا يسامحك ياحاج! زودت إحساسنا بالضآلة والمهانة وهواننا على المسئولين عنا .. وعلى فكرة .. هى دى قيمة البحث العلمى فى مصر .. ولعل ميزانية مركز البحوث الزراعية أبلغ دليل عن ذلك..!

كفاية كده يا د.هويدا وجعت فلبى أكتر ماهو موجوع ..وعايز افكركم بحاجة .. فى الوقت اللى بتزود فيه الدولة المعاشات اللى بنزيده فى معاشاتنا بيتخصم من بدلاتنا!!! وكأنك يا ابو زيد ماغزيت! شفتم مسخرة أكتر من كده؟ يعنى ها نفضل محلك سر! ولا أحد يتحرك لتصحيح هذا التهريج!

عزاء من القلب لآسرة فقيدنا العزير فلا نملك لكم الا مساندة أدبية – ومادية على قدر امكانياتنا الضئيلة لا تغنى ولا تسمن من جوع! وطول ما احنا فى مركز البحوث الزراعية مالناش أصحاب .. ياريت د.مصطفى مدبولى رئيس وزراء مصر المحترم يفكر بجدية فى إحياء الفكرة القديمة بضم مركز البحوث الزراعية الضال الى اكاديمية البحث العلمى طالما أن المسئولين عنا مش فاضيين لينا والى كل الزملاء من الهيئة البحثية بالمركز .. لنا الله .. فالشكوى لغير الله مذلة ولكم خالص أسفى على إثارة مواجعكم.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *