آخر الأخبار
الرئيسية / ع الزراعية / زيارة لخالتي بهانة

زيارة لخالتي بهانة

بقلم: د.مدحت مراد

حبايبى الفلاحين .. الناس الطيبين .. أبدأ كلامى معاكم بالسلام .. وتقديم فروض التحية والاحترام .. اسمحولى أقدم نفسى .. عشان من زمان كان نفسى .. أقابلكم على موقع الفلاح اليوم .. لجل ناخد بأسباب النجاح ..  أنا الدكتور مدحت مراد  واحد مصرى م العباد .. نفسه بلده  تبقى أحسن البلاد .. وفيها مستقبل كويس للولاد .. ففكرت مع داخلة سنة جديدة .. أتمنى تكون علينا سعيدة .. نعمل حاجة مفيدة .. فأتفقت مع د.أسامة ..  أتقابل معاكم ياما .. من غير شر أو ملامة .. نبص على أحوالنا .. ونفكر فى اللى جرالنا .. يمكن مع بعض نعدل المايلة ..

فجأة .. حسيت إنى تعبان ومخنوق! ومدروخ وعايز أفوق .. قلت أنزل أشم شوية هوا .. وأشوف لخنقتى سبب   ودوا! فكرت أمشى ع الكورنيش .. جايز تراب مالاقيش…. حنيت لآيام زمان .. لما كان فيه أمن وأمان .. للآسف حصلتلى أزمة! من غير داعى ولا لازمة .. هفتنى نفسى على كوز درة !. من غير كدب ولا نأوره .. سألت بكام ياعم الكوز؟ قالى بخمسة جنيه يابيه؟!  صرخت وانا مذهول .. ليه؟ خطف الراجل من إيدى الكوز .. ولوى وشه فى خلقتى وضرب لى بوز .. قالى هوه انت مش عايش معانا يابيه؟ مش دريان باللى حصل والا إيه؟!

مشيت وسبته وانا مصدوم .. كوز درة نفسى فيه .. منه انا محروم!  إفتكرت لما كان الكوز بقرش .. تاكله يملا الدماغ والكرش .. قلت لازم أعرف إيه الحكاية؟  حتى كوز الدرة بقى حدوته ورواية! فكرت ساعتها فى خالتى بهانة .. ست زاد عمرها عن السبعين .. وشها ملياه تجاعيد السنين .. ست بالخبرة مليانة وعندها حكمة وجلد..

خدت أول قطر ع البلد .. قابلتنى بالترحاب وبكنت فين يا ولد!  خلاص نسيت أهلك والبلد؟  رديت .. أبدا .. والله ياخالة .. جيت تقوليلى .. وصلنا إزاى لدى الحالة؟!

دار بينا حوار قلت احكيهولكم .. فيه خبرة قلت أوصلهالكم

* شفتي يا خالة وصلنا لإيه؟ كوز الدرة بخمسة جنيه !؟

خالتى بهانة: هوه انتوا لسه شفتوا حاجة؟ مدام مانتم ما بتعملوش حاجة! الدنيا اتشقلب حالها .. وما حدش عارف مالها؟

*  طب إيه السبب يا خالة؟

خالتى بهانة: بص يا ابنى حواليك .. مفيش عمالة فى البلد .. وهجرتها البنت والولد .. والآرض زرعوها مبانى .. واللى لسه بيزرع بيعانى  .. يابنى زمان كان الريف خير للمدينة .. وأمن غذائي وبركة وزينة!

دلوقتى بقى عبء عليها .. والغيطان قليل اللى فيها!

* وبعدين ياخالة؟ هاتفضل لإمتى دى الحالة؟

خالتى بهانة: لازم يا ابنى تزرعوا أكل يكفيكم  .. وقطنكم هوه اللى ها يدفيكم .. وتربوا بهايمكم لجل ما اللحمة تكفيكم .. وتبطلوا استيراد حاجتكم من الغريب ..  اللى عمره ما ها يكون حبيب! .. إرجع يا بنى لزمان .. لما كان .. فى زرع القمح والدرة الآمان .. دلوقتى بقيتوا تستوردوا حتى الفول! وآدينى ها أحكيلك وأقول .. إرجعوا لزراعة الدرة .. سواء ع الكيف أو بالمسطرة .. فيها الآمان .. ليكم وللحيوان.

* قوليلى طب نعمل إيه.. عشان المصرى يفتح عينيه؟

خالتى بهانة: يابنى الدرة فيها فوايد كتيرة .. ممكن تكلوها طحين وتعملوا منها عيش .. وساعتها تأكلوا الناس والجيش .. وممكن تكلوها محمصة ومسلوقة .. وإوعى تنسى الفشار .. بيحبوه الصغيرين والكبار. وكمان تستخدموها علف للحيوان … زى ما هى مفيدة للانسان. وأنواعها برضه كتيرة .. عندك الدرة الشامية والصفرا والرفيعة والعويجة .. وكلها تتزرع بالعقل مش بالهوجة!

* قوليلى يا خالة .. إزاى نجيب إنتاج وفير .. يكفى الصغير والكبير؟

خالتى بهانة: من غير لف ولا دوران .. خلى بالك يا أبو السرحان .. لازم جو المنطقة يبقى مشمس وحر شوية .. والأرض صرفها كويس وتستعملوا  الاسمدة العضوية  .. وتزرعوا الحبوب فى سطور .. على عمق 5 سم لحمايتها من العصفور .. وتغطوها كويس بالتراب .. عشان ناخدوا انتاج زى ما قال الكتاب .. والمسافة بين الحبوب من 10 –  20 سنتى .. عشان العيدان تطلع مرتاحة .. وما تقولشى يا حومتى!. وها نحتاج على الآقل 90 يوم نمو حتى الحصاد .. ولابد من اتباع التوصيات والعناية والاجتهاد .. ولو كان جو المنطقة غير مشمس نزرع الآصناف سريعة النمو والمنتجة للكيزان .. عشان نوفر أكل الإنسان والحيوان .. ونحصد الكيزان لما يبقى قلبها مليان .. والحبوب قلبها جاف ورايق و غلافها أخضر غامق …

* طب أفضل أصناف الذرة اللى نزرعها إيه يا خالة؟

خالتى بهانة: الدرة الصفرا لإن بياكلها البنى آدمين .. الرفيع والنخين .. بعد طحنها أو سلقها ..  والحيوان بعد جرشها .. وممكن تدخل فى صناعة الكحول والنشا..  وزيت الدرة المضمون .. والبلاستيك والورق والكرتون!

* طب إيه يا خالتى اللى نراعيه .. ونخلى بالنا منه ونهتم بيه؟

خالتى بهانة: لازم توفروا إضاءة كفاية وميه كتير .. لأن تأثيرهم كبير..  ودرجة الحرارة تكون معقولة .. عشان تاخدوا حبوب صفاتها مقبولة .. ولإن الدرة الصفرا من أهم المحاصيل النباتية .. اللى بتدخل فى كتير من الصناعات الغذائية ..  لازم نتوسع فى زراعتها .. ونخلى بالنا منها .. ونقوم برعايتها.

* بس فيه حاجات تانيه ما قولناهاش .. ولازم الناس تعرفها عشان لما تزرع مانغرقهاش!

خالتى بهانة: لازم يابنى ترجعوا لبرامج ونشرات الارشاد الزراعى .. وما تقولوش مالهاش لازمة ولا داعى! عشان كل يوم فيه أصناف وتوصيات جديدة .. بتديكم معلومات محترمة ومفيدة  .. وربنا يابنى يحفظكم ويرعاكم .. ويعينكم على أيامكم.. ويسترها معاكم.

* شكرا ياخالة ..ربنا يديكى الصحة و شوفك على خير.

خالتى بهانة: يا ابنى ابقى تعالى .. خلينا نشوفك .. تصبح على خير.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *