ع الزراعية

كله بيضحك على كله!

بقلم: د.مدحت مراد

حد ممكن يقول لى .. ليه مش مصدقين تملى .. إن أحوالنا بقت صورة بالقفا! والوش على ضهره انكفى! وإن عيشتنا بقت عجب .. وحاجات كتير مابقلهاش سبب!  لو لسه مش شايفين  .. ولسه مش حاسيين  …. حد يقوللى ..  إيه اللى إحنا فيه؟ وليه وصلنا بسرعة ليه!

سيبونى أقول الحكاية كما حصلت م البداية .. نزلت من البيت إمبارح .. عديت الشارع وانا سارح ..  لقيت كشك عم شحتة قدامى .. بعد الترحاب ورد سلامى .. الراجل جابلى جرنان .. مش باين له عنوان ..  فيه زيادة الريس للمعاشات .. فكرت فى المشاكل لو الواحد مات ..  كل الناس بتتعدل أحوالهم .. الا الأساتذة المتفرغين بيتشلقب حالهم .. اللى بنزيده .. بيتخصم من البدلات .. و سنة بعد سنة بتقل المرتبات و والمتفرغين محلك سر  .. عايزين تزيدوا؟ بعد الشر!

.. وكأنك يا ابو زيد ماغزيت .. وإنتم بقى .. إضربوا دماغكم فى الحيط! وصرخنا واشتكينا .. لما اتهرينا .. ولا حد سامعنا .. أو حاول يزيل أوجاعنا .. لا رئيس مركز ولا مدير ..  كأن مالناش صاحب ولا وزير! .. وكله بيضحك على كله!.

أما عن أحكام بدل الجودة .. فما كانش لينا بداية أو عودة!  أحكام نهائية ..  واجبة النفاذ بـالقوة الجبرية .. 8 سنين مش عارفين ننفذها .. و الا نروح بيها لمين .. و لا حد وقف معانا .. ولا حد قال انتوا فين .. والمسئولين عنا دخلوا المغارة .. لا حس و لا خبر .. و لا حتى إشارة .. و آهو كله بيضحك على كله!.

أما عن الـ78% ..  فبقت ورقة عايمة ع الميه .. 6 أشهر تبعتهم المالية .. و 6 راحم فى الوبا  .. و السبب كان الغبا .. ومنه لله اللى كان السبب .. ربنا يورينا فيه العجب! .. و آهو كله بيضحك على كله!.

استحالة اللى بيحصل لنا .. أثر كتير على شغلنا .. بعد ما أفنينا عمرنا .. وخلانا محبطين .. عايشين تعبانين و عيانين .. وبرضه مستحملين .. يمكن حد ياخد باله مننا .. وآدى احنا سلمنا أمرنا .. ورفعنا ايدينا لربنا .. ياريس انت اللى لينا .. مادام الحكومة مش سائلة فينا!  و وزير المالية ناسينا .. و يمكن .. بدل ما كله بيضحك على كله! جايز حد .. يسمعنا و نقوله.

تابع الفلاح اليوم علي جوجل نيوز

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى