الأجندة الزراعية

الوصايا العشر لزراعة البطاطس الشتوي تحت نظام الري المحوري

كتب: صابر عبدالرحمن فى السطور التالية سنعرض الوصايا العشر وانت بتجهز نفسك لزراعة البطاطس الشتوى تحت نظام الرى المحورى.

1ـ التقاوى تكون عاملها صح .. ومدرجها صح .. وعملت ليها نظام خروج من التلاجة .. للطرقة .. للمظلة .. ومتنساش التنبيت الجيد المثالى ليها .. اوعى تقطع البطاطس الكسر .. عاملها بالمطهرات الفطرية وهى فى الجامبو او الشيكارة وكمان وانت بتحطها فى التربة.

2ـ التربة بقت موبؤة بامراض كتيرة ومشاكل كتيرة .. ريزوكتونيا وفيوزاريوم وفرتسليوم وكمان نيماتودا .. عشان كدة اولا اقلب الارض كويس وطهر التربة دى قبل الزراعة .. بقى فية حاليا مبيدات متخصصة للريزوكتونيا زى المومينتو وغيرها .. وكمان باقى الامراض ليها مركبات تانية .. نظافة التربة قبل الزراعة فى ظل عدم وجود دورة زراعية وزراعة بطاطس كل سنة خلاها مليانة بكل شيئ .. ياريتك تطهرها كويس عشان تحط التقاوى فى مكان معالج وشبة معقم.

3ـ فية ناس متخيلة ان اختيار اتجاة الزراعة موش مهم .. الزراعة الشتوية عاوزة هوا واختيار اتجاة الخطوط يبقى مع اتجاه الهوا وليس عكسة وكمان الشمس متكونش بتضرب جانب الخط عكس العروة الصيفى اللى عاوزة تدفية للخطوط .. وكمان لو عندك ميول فى البيفوت لازم الاتجاة يكون عامودى علية عشان الرى والمية متجريش على برة.

4ـ أسمدة الاعداد راعى يكون فيها شيكارة كبريت .. مهم جدا عشان تخفض درجة قلوية التربة .. والسوبر الافضل يكون الثلاثى وياريت يكون قريب من الدرنات وفية شركات عندها بلانترات تعمل دة.

5ـ المادة العضوية مهمة جدا اوعى تغفلها .. اى مصدر كومبوست .. سبلة .. حمض هيوميك .. المهم المبدأ يكون متوفر ومقتنع بية.

6ـ عدد مصادر الفوسفور واهتم بية حتى عمر ٥٥ يوم .. انت عاوز فى الاول جذور كويسة وبعدين طاقة متوفرة تخلى النبات ميحس كتير بالاجهادات الفسيولوجية المستمرة اللى دايما بيمر بيها خلال مراحل نموة وحياتة.

7ـ التغذية المتوازنه خلال المراحل المختلفة للبطاطس هى اللى هتخلية يقاوم الامراض ويصب بدرى ويفضل عفى حتى اواخر عمرة .. ومتغفلش دور واهمية اى عنصر وبالذات العناصر الصغرى .. و اعتمد دايما على مصادر طبيعية فى التغذية.

8ـ مسافات الزراعة مرتبطة بسلوك الصنف والمسافة بين الخطوط والحجم وحاجات كتيرة سعادتك ..خلى قلبك جامد ومتوسعهاش قوى .. والعمق كمان مهم .. عشان الاخضرار والسوسة فى الصيفى.

9ـ الرى وما ادراك ما الرى .. علم وحسبة وتكلفة واحتياجات محددة .. خليك شاطر وعلمى واعتمد على خبرتك ونوع ارضك والاجهزة الحديثة فى قياس الرطوبة .. استفيد من كل الادوات اللى معاك.

10ـ العمر لكل صنف والمعاملات قبل الحصاد لازم تكون عارفها وفاهمها ومارستها .. بركة المحصول فى لمه وجمعه والمحافظة علية من الكدمات والجروح والتهدير .. عاملة كأنة بيض لحد متوصلة للمحطة.

تابع الفلاح اليوم علي جوجل نيوز

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى