أبي الذي سبق زمانه دروس لا تُنسى

بقلم: هند معوض

بالأمس كانت ذكرى ميلاد أبي، فممكن أحكي شوية عن حاجات كان بيعلمها لنا، وفعلاً لما كبرت وبدأت أعي، عرفت قد إيه كان مخه كبير قوي، وتفكيره كان سابق عصره..

كان كل جمعة بياخد الأسرة كلها لمكان أثري، زرنا المتحف المصري والمتحف الزراعي ومتحف الشمع، وطلعنا الأهرامات من فوق، ورحنا الفيوم وزرنا عين سيلين والسواقي وبحيرة قارون وأماكن كتير قوي، بس مكانتش زيارة وخلاص، ده كان لازم يخلينا نلمس الشيء بإيدينا، ويفضل يحكي عن تاريخها وعظمة التاريخ بتاعنا، ويحكي قصة كل أثر، ويطلع عبر ومواعظ كتير، ويعلمنا دروس في الحياة..

كان كل يوم لما يرجع من الشغل يشغل الكاسيت على كورس تعلم اللغة الإنجليزية، وبعده الفرنسية، ويفضل الكاسيت شغال وإحنا بنسمع، حتى لو مش منتبهين، بس فجأة بنلاقي نفسنا حافظين كل الحوار اللي بيتقال، والغريبة إني لسه فاكرة لحد النهارده الحوارات دي، وبرددها بنفس طريقة الكاسيت، وكانت وجهة نظره إن اللغة بنكتسبها بالممارسة، ولو مش بنمارس يبقى من كتر السمع..

مرة أخدني من الصبح بدري وخرجنا، وقال لي النهارده هنتفسح سوا، وهدخلك سينما. أنا فاكرة قوي إنه كان فيلم لعادل إمام اسمه “رجب فوق صفيح ساخن”. قبل الفيلم ما يبدأ قال لي: على فكرة أنا مش بحب السينما قوي، وصعب أجيبك هنا تاني، بس أنا عاوزك تبقي دخلتي سينما وشفتيها، ولما حد يتكلم قدامك عن السينما متحسيش بالحرمان أو إنك مشوفتيهاش قبل كده.. بعد السينما دخلنا نتغدى، وطلب أغلب الأكل باللغة الإنجليزية، وبدأ يقول لي: شوفي الجرسون فاهم الكلام إزاي عشان تعرفي إن اللغة ممارسة.. بعدها دخلنا جروبي، والمرة دي اتكلم باللغة الفرنسية بداية من كلمة “جرسو”، وقال لي معناها ولد، وإحنا بنقولها لمن يقدم الطلبات، وبعد كده طلب كل حاجة باللغة الفرنسية، ولحد النهارده لسه فاكرة كل حاجة طلبها ومعناها..

لما كنت في أولى إعدادي، أعطاني مصروف البيت بالكامل، وقال لي: يالا اصرفي على البيت واتعلمي تعملي ميزانية للبيت، وطبعًا كنت بشتري حاجات ليا كتير وبوظت الميزانية، بس لما ماما كانت بتعترض كان بيقول لها: سيبيها تغلط وتتعلم، وإحنا نوجهها..

كان ساعات بينادي عليّا ويخليني أمسك فلوس كتير وأعدّها، ويقول لي: عشان لما تتجوزي وجوزك يديكي فلوس تبقى عينك مليانة، ورهبة الفلوس تزول من جواكي..

ياااه حاجات كتير قوي اتعلمناها من بابا، ولسه مغروسة جوانا، وعمرنا ما هننساها، وعمر ما أب أو أم يفتكروا إن اللي بيعملوه مع ولادهم بيروح هدر.. لا والله، ده بيفضل مغروس جواهم وبيكبر مع السنين.

🔹 تابعونا على قناة الفلاح اليوم لمزيد من الأخبار والتقارير الزراعية.
🔹 لمتابعة آخر المستجدات، زوروا صفحة الفلاح اليوم على فيسبوك.