يا عالم .. رمضان كريم!
بقلم: د.مدحت مراد
حاولت أكتر من مرة .. أكتب عن الحقيقة المرة .. عن حاجات كل سنة بتكرر .. وبتتعب أجسامنا ولحياتنا تمرر .. ورغم إن إحنا عارفينها.. وبلاويها قدام عينينا شايفيناها.. وعمالة فينا تبهدل .. رغم كده .. بنستهبل! .. والمصيبة إنها بتكتر وتزيد .. وما حدش عايز الأنوار تقيد .. شهر رمضان .. شهر الكرم والإحسان .. للأسف حولناه من شهر كريم .. لشهر تضييع وقت وعبث أليم! بتسألونى إزاى .. طب تعالوا معاى!.
أول حاجة الإعلانات .. بتتذاع وتتعاد بالساعات .. وياريت ليها مغزى أو سمات! إنما عبارة عن سخافة وصوت عالى يجن! يطير نافوخك ويخليك تئن! وأول كارثة فيها .. محتواها وغباوة معانيها .. فعن الزيوت المهدرجة حدث ولا حرج .. ولا مسئول سمعها.. اتهزله جفن أو إتحرج! إشى بطعم الزبدة الفلاحى! وشوفى يا حماتى شطارتى ونجاحى! وشدى حيلك ياهانم .. سمنتنا سمن الهوانم! .. أما اللى عايزة تعيش مع جوزها فى الجنة .. تطبخ بسمنتنا اللى فيها الإن! رغم إن أخطار الزيوت المهدرجة .. معروفة ومؤكدة وفى قوائم مدرجة .. والغريب إنى من كام سنة .. فكرت أحوش الغم والضنا .. بعت مقالة لجريدة مشهورة .. كتبتها وبتوقيعى ممهورة .. رد على رئيس مجلس الإدارة .. قاللى إتلم يا أخويا وبلاش شطارة .. دى صناعة وراها ديناصورات! وأنا ما أستغناش عن إلإعلانات .. ومقالاتك بلها .. واشرب ميتها بالهنا! وأبعد أوهامك عننا! سؤال سألته لنفسى .. كتم صوتى وحتى همسى .. هى فين وزيرة الصحة؟ صوتنا انحاش وبقى بحة! كل دول العالم بطلت استعمال الزيوت المهدرجة .. واحنا روسنا على اكتافنا مدحرجة. واللى يجن .. حتى السمنة عملوها فن! إيشي بـجوز الهند وايشى عملنالك سمنتين .. وانت كل واتسرطن يا نور العين! واللى مش مصدقنى يخش على النت .. اقطع دراعى لو مخه ما شت!
حاجة تانية بقينا مدمنين ليها .. كلنا عايشينها وغرقانين فيها.. ما نصدق يا ابنى رمضان يهل من هنا. ماتعرفش إيه اللى بيحصل لنا؟! مسلسلات عبارة عن سخافة وإسفاف .. اللى عايز يربى أولاده لازم يخاف .. حوادثها كلها استخفاف .. بعقولنا وألفاظها .. نجنا يا خفى الآلطاف .. فين الرقابة؟ كأن لا حد سمع ولا شاف!
المصيبة إننا حولنا شهر العبادة .. لكل اللى يبعد الناس عن السجادة! وبدل التليفزيون ما يبقى وسيلة هداية ..اتحول فجأة لوسيلة غوايه.. يا عالم .. ده شهر بنستناه م السنة للسنة .. شهر بنحاول نقرب فيه من ربنا .. ارحمونا .. خلوا ربنا يرحمكم .. ويبعد الشيطان عننا.
متهيألى كفاية كده .. داخل علينا شهر كريم .. مش محتاج منا غير التكريم .. ربنا يجعله شهر عبادة والتزام .. ويقدرنا على الصلاة والصيام .. وبغفر لنا ويرحمنا .. ويسعدكم .. ويحقق أحلامنا وأمالنا.
