هانبيع مركز بحوث الصحرا يارجالة؟!
بقلم: د.مدحت مراد
حاولت كتير أمسك نفسى .. إنى ما أصرخش وأعلى حسى! وأكون مؤدب ومتربى .. بس غصب عنى ياربى .. لما نايب إحنا اللى انتخبناه .. ولـمجلس النواب دخلناه .. كنا فاكرينه ها يدافع عن حقوقنا .. ويأمن لنا لقمة تسد جوعنا .. ويوصل صوتنا للى فوق .. آتارى البيه كان نايم ومحتاج يفوق .. راح البيه طالع علينا فجأة .. وبمنتهى الألمعية والجرأة .. يطالب ببيع مركز بحوث الصحرا!!؟ أرضه تجيب فلوس كتيرة وبلاها خضرة! دى فعلا أيام سودا وغبرة .. بدل سعادة البيه ما يطالب يتطويره .. راح طالب بيعه أو تأجيره! وتسريح علماؤه ورميهم فى الشارع .. وأهم ينفعوا يبيعوا كرشة وكوارع!
أد كده بقت الغفلة والغيبوبة؟ .. والنبى .. ده لو المخدرات فى السوق مضروبة .. ما ينفعش يتقال كلام زى ده .. وألا ده بقى عادى؟! الجهل يوصل للدرجة آدى؟! والغريب أن ماحدش فى المجلس أو وزيرنا رد عليه..!! ياترى سادتنا النواب .. ممثلينا الأعزاء والأحباب .. موافقين ع الكلام الفارغ اللى اتقال؟ وألا شايفين الكلام عال العال! وسعادة البيه ع الاكتاف يتشال!
ياعالم .. الدول بتتقدم بـالعلم .. مش بالشعوذة والحلم .. والنهاردة نبيع مركز بحوث الصحرا .. بدل مانطوره عشان نزرع الصحرا .. وبكرة مركز البحوث الزراعية نشوفله بيعة .. ومفيش مانع ناخد معاه المركز القومى للبحوث ع البيعة! بلا بحوث بلا غم .. وانت انبسط ياعم .. خلصناك من علما شايلوك الهم .. كل شوية عاملين لنا أزمة .. هما دول ليهم لازمة؟! ويحيا فكر نايبنا المستنير.. خلى عقلى كان ها يطير .. ومالها الفلوس؟ حد يكره الفلوس؟ هاتدلعك يا متعوس! بلا علم بلا بحوث .. خلونا نهبش الفلوس .. ونلم القرشنات .. وآهو التعلب فات ! وأبوك السقا مات.
أما أنت يا د.اسماعيل عبدالجليل .. يا عالم .. يامحترم .. ياأصيل .. ربنا يسامحك على حرقة دمى .. لما قريت كلمتك فى موقع الفلاح زودت همى .. إحنا فى مراكز علمية مالهاش اصحاب .. لا حد سامعنا .. وبقينا أغراب! يظهر مفيش قدامنا غيرك ياريس .. أولادك واخواتك بيقولولك .. الحقنا ياريس .. .. واسمحلى أوجه لفخامتك دعوة …. تيجى تزورنا .. وتسمعنا .. مابقاش لينا غيرك .. لو ظروفك سمحت .. يبقى كتر خيرك.
