رأى

نصيحة لوجه الله في رمضان.. وأنت حر

أ.د/عبدالباسط صديق

بقلم: أ.د/عبدالباسط صديق

أستاذ بكلية التربية الرياضية ـ جامعة الإسكندرية

الوصايا العشر.. وهذه النصائح منقولة عن تجارب شخصية لى فى العمل الخيرى وأيضا لمن نثق فيهم من الأصدقاء (برضه انت حر)..

١- ماتتبرعش لـمستشفى سرطان الأطفال (اللى يقدر يعمل إعلان بمبلغ 50 مليون يبقى حرامى ونصاب) ولا يستحق تبرع منك أو من غيرك. (برضه نقول تانى انت حر).

٢- اى جمعية خيرية هاتنزل إعلان جمع تبرعات فى رمضان ماتتبرعش ليها (لأنهم يأخذون لأنفسهم 50% من فلوسك تحت بند والعاملين عليها سبوبة يعنى والقائمين عليها أصبحو يركبون سيارات مرسيدس آخر موديل بعد ما كانو على قد حالهم …طيب منين؟). (ونقول تالت انت حر).

٣- لو عاوز تتبرع أو تكفل مريض روح بنفسك مستشفى الأطفال أو اي مستشفى حكومى اختار مريض واتكفل به مباشرة أو اسأل الأطباء عن ما ينقصهم من أدوية وأدوات طبية وروح هاتها لهم بنفسك بدل ما تدفع لهم فلوس (يعنى اتعب نفسك شوية من أجل أن يكون تبرعك فى محله ولمن يستحق).

٤ – كتير من السيدات المحبوسات علشان جهاز بنتهم يستاهلوا الحبس؛ ماهو مش لازم الفشخرة، واروح اجيب ٥٠ طقم ملاية وطقم الصينى والاكروبال ابو ١٠٠٠٠ جنيه؛ اقسم بالله أعرف واحده مش لاقيه تاكل جبنا لبنتها تلاجه ١٢ قدم جديدة رجعتها وقالت دى ضيقه. لكن لو انت عارف حد فى منطقتك يستحق فعلا المساعدة توكل على الله وساعد على قدر ما تستطيع.

٥ – اللى بيمشوا فى الشوارع يشحتوا اوعى تديهم فلوس وتحرى الدقة لان معظمهم واخدها مهنة … وابحث عن الفقراء المتعففين واكيد فى منطقتك موجود منهم …وياسيدي الأقربون أولى.

٦- كنت مره فى مكتب البريد قعدت جنبى ست بتكلم ابنها وبتقول له والله يابنى مش معايا غير ٣٠٠ جنيه وقامت عيطه .. إللى فهمته منها انها بتبعت لابنها ثمن حقنتين انسولين .. كملت لها الفلوس.. بعد شهر اتصلت عليها علشان تبعت لابنها ياخد انسولين مدعم رفضت وقالت ابعت فلوس. الخلاصة .. طلع فيلم هندى واتنصب عليا .. فبلاش تبقى مرهف المشاعر ودمعتك قريبة وخللى قلبك حجر وانت بتتاكد من احقية الشخص اللى قدامك.

٧- رمضان موسم لناس ومؤسسات محترفة التسول واوعى تقول انا بتصدق واحتسب الثواب لأن غالبيتهم نصابين. ويستغلون طيبة قلبك يسرقون تبرعك وكمان بالقانون.

٨ – كل جنيه انت بتتصدق به على طفل واقف فى اشارة مرور أو سيدة بتشحت ومعاها اطفال هو مساهمة مباشرة منك فى زيادة خطف وسرقة ومزيد من استغلال الأطفال دى.

٩- خد بالك إن النية الصالحة لا تصلح العمل الفاسد.

١٠ – احق ناس بالصدقة المتعففين والعاملين ف المهن ذات الدخل البسيط والأمثلة كثيرة مثل البياعين السريحة فى الشوارع وفى الأسواق واللى بيتشغلو سكيورتى فى العمارات .. وغيرهم كتير … المهم تتحرى الدقة حتى تصل مساعدتك أو زكاتك أو تبرعك لمن يستحق.

تابع الفلاح اليوم علي جوجل نيوز

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى