نصائح الخبير الزراعى صابر عبدالرحمن: “عشان تبقى حريف زراعة بنجر السكر”

كتب: م.صابر عبدالرحمن

ـ احرث الارض مرتين حرث جيد.
ـ حط اسمدة الاعداد ومتنساش شيكارة كبريت.
ـ اعمل تسوية جيدة ومتزهقش لحد ما تبقى الارض زى المرايا فى تسويتها.
ـ اعمل مصطبة كويسة محترمة وازرع عليها خطين بنجر او خطط الارض بمعدل ١٢ خط فى القصبتين.

ـ لو حريف حط ٤٥ الف نبات فى الفدان لو البذرة عديدة الاجنة ولو بتزرع بالبلانتر وبذرة وحيد الاجنة حط ٥٥ الف نبات للفدان.
ـ المزارع الشاطر هو اللى يعرف ازاى يروى ارضه لحد ما يبقى عندة نسبة انبات لا تقل عن ٩٠%.
ـ لو عديت اول ٢٥ يوم وعندك ٩٠% انبات يبقى ااقدر اقولك .. ابشر هيبقى عندك محصول جيد.
ـ الكالسيوم فى اول ٣٠ يوم و الله العظيم مهم ومتستخصرش حطلك شيكارة منه.
ـ الماغنسيوم هيخلى زرعك فله من اول ٣٥ يوم و حتى ٥٠ يوم حط شيكارة مع مية الرى.
ـ الدودة واخواتها لعنه فى اول ٤٠ يوم رش بـالمبيدات المناسبة.
ـ الحشائش هيه اللى بتحدد انتاجك .. اه و الله .. خليك مع النظافة اليدوية والعزيق ولو معرفتش اسألنى وانا أأقولك ترش ايه.
ـ اوعى تنسي رشة بورون حلوة كدة على على عمر ٧٠ و ١٠٠ يوم.
ـ خلى بالك من التبقعات ورش حاجة وقائية.
ـ متكترش من اضافة الازوت وأوقفه خالص على عمر ٩٠ يوم عشان السكر يزيد.
ـ العمر له علاقة بالانتاج مستعجلش واوعى تشيل بنجرك قبل ١٨٠ يوم ولو انت فرود خليها ١٩٠ او ٢٠٠ يوم.
وعيش وربنا يكرمك ويوفقك.