رأى

قرية تونس

أحمد عبدالرحمن أحمد

بقلم: أحمد عبدالرحمن أحمد

قرية تونس إحدى القرى التى قدر لها أن تتخلص من البطالة بفضل الفنانة السويسرية إيفيلين بيوريه، فالقرية التى تبعد حوالى 60 كيلو متر عن مدينة الفيوم وتتبع مركز يوسف الصديق حولتها الصدفة من قرية ريفية بسيطة شديدة الفقر آلة قبلة للجمال والفن والطبيعة الخلابة يتجه إليها عشاقها من جميع أنحاء العالم وأجبرت العديد منهم على ترك بلادهم من دول العالم الأول ليقيمون فيها.

قرية تونس بمجرد ماتوصل لها مش هاتصدق نفسك إنك فى قرية مصرية أو مكان على وجه الأرض، قد تتخيل للحظات إنك تقف وسط لوحة فنية لفنان عالمى ولكنك سرعان ما تدرك أن هذا الإبداع لا يمكن أن يكون إلا من صنع الله تعالى حيث تقف فتنظر الى الزرع والخضرة الخلابة بعدها تأخذك عيناك إلى المياه الزرقاء لبحيرة قارون وسرعان من يلفت انتباهك اللون الأصفر لصحراء شمال البحيرة.

موقعها الممتاز لم يكف أن تلتفت أنظار المسئولين الى القرية لسنوات طويلة ظلت قرية ريفية بسيطة ينتشر بها الفقر والمستوى المتدنى للتعليم إلى أن جاءت إليها فى زيارة السويسرية أيفيلين بوريه ومن هذا الوقت قدر لتونس أن تتحول الى أعظم قرية مصرية وقبلة عالمية للفن.

والسيده ايفلين اقامت فى القرية وتركت سويسرا بلدها وتزوجت الشاعر المصرى سيد حجاب ووهبت نفسها لتعليم اهالى القريه فنون الخزف، حتى الان حينما تزور قرية تونس لا تصدق ان هذه القرية مصرية بسيطة، واكتر قرية بها جنسيات اجنبيه مقيمين اقامة شبه دائمة على ما اعتقد 25 جنسية من بلاد مختلفة.

احنا بقي شدينا الرحال على هناك نزلنا موقف المنيب اخدنا عربية ابشواي قارون بـ25 جنيه الفرد نزلنا قصاد الباب الرئيسى للقريه نزلنا فى كامب بسيط هناك اللى عايز اسمه ممكن يتواصل معايا هو سعره 100 جنيه الليلة بدون فطار.

عندهم فطار فطير وعسل وجبنه زى مانت حابب وممكن تفطر بره زى ماتحب بس الكامب مستواه فى المعقول.

حطينا شنطنا فى الكامب ونزلنا نصور ونتفرج عالقرية، فيها شوية فنادق عاليه بصراحه انا اتخضيت من سعر الليله هناك من 600 جنيه حتى 5000 جنيه ايوه والله زى ما قريت كده 5000 جنيه فى الليلة.

اتفرجنا على القرية ومعارض الخزف واكتشفنا مكان بقى فله وهو ورشة دكتور محمود يوسف للخزف المكان عباره عن ورشة ومعرض وكافيه ومطعم اول ماتدخل من البوابة الرئيسية هتلاقيه على شمالك.

في ورشة دكتور محمود فى مدام مريم هولندية الجنسيه منتهى النشاط والحيويه بتعمل شوية اكل وكيك خرااااافة. وبتعمل الاكل بمنتهى الحب اه والله اصل المشاعر بتاثر فى الاكل ياجماعة والله وبالمناسبة بلاش تطبخى فى بيتك وانتى متضايقة او زعلانة، الاكل هايطلع وحش دى معلومه ليكى بقى.

المهم سهرنا فى المكان دة ومدام مريم قامت معانا بواجب الضيافة زى اى مصري اصيل مرة كيك ومرة شاى تشكر بصراحة حتى محمد الشاب العشرينى اللى شغال معاها بيتعامل بنفس المعاملة ولد فى منتهى الذوق والبشاشة.

تانى يوم اخدنا عربية وطلعنا على محمية قارون وفيها جبل قطرانى فى المحمية دى فيها حفريات تاريخيه تقرب لـ45 مليون سنة.

ممكن تروحوا تعملوا ساند بوردنج (تزحلق على الرمال) وممكن تزوروا جبل المدورة ومحمية وادى حيتانى بس المسافة بعيدة شوية وعايزة يوم تانى بس احنا اكتفينا بـقرية تونس بصراحة
ممكن تركبو فلوكة بس احنا فضلنا اننا نشرب قهوة علشان الطريق ورجعنا تانى للقاهرة بعد يومين بليلة.

*كاتب المقال: أخصائي دعم فني في هيئة سكك حديد مصر.

تابع الفلاح اليوم علي جوجل نيوز

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى