ضرب القفا .. في مجال البحوث الزراعية .. وكفى!

بقلم: د.مدحت مراد

جت لى فكرة مجنونة .. بعدها .. الناس ها تبعد .. والا ها يجونا! ومش عارف .. بجد .. أنا خايف .. كتبت كتير تحت عنوان ع الزراعية .. كتابات حققت نسبة مشاهدة معقولة .. لا هى قليلة .. ولا هى مهولة!

كنت فاكر انى رميت حجر فى المية الراكدة .. يمكن سعادة البيه المسئول لو عدى .. ياخد باله! أتاريه مر .. حتى ما هدى ! غصب عنى بصيت حواليه .. جايز الاقى حاجة فى المية!

سمكة طلعت لى لسانها .. والتانية غمزت بعينها .. وعنها .. قلت لنفسى اكيد فيه حاجة غلط .. ليه الكل عمل عين من طين .. والتانية زلط! .. حتى اللى كتبت عشانهم .. وقلت لنفسى أنا منهم .. انبه عن مساوىء زمانهم .. كلهم اكتفوا بالقرايه .. اللى ما حد علق ع الكلام .. ضدى أو معايا!.. واكتشفت انى بادن فى مالطة .. يظهر لما فتحت صدرى .. كانت غلطة!..

فكرت أريح نفسى ودماغى .. من كتاباتى اللى ها تجيب داغى .. وفكرت ابطل اكتب تانى .. هاتف جوايا قالى .. جرى ايه يا عم اللاللى .. عمرك ماكنت جبان وانانى .. عشان كده ها أفضل اكتب .. ولا ها ألوم ولا ها اعتب .. بس عايز آخد رأيكم .. دام عزكم و فضلكم .. بافكر أغير فى العنوان .. مادام مفيش مسئول ظهر وبان .. ولا حد اهتم يرد ع المكتوب .. كأن اللى احنا فيه .. علينا مكتوب .. وأغير ع الزراعية الى ع  القفا .. طالما الكل بالقراية اكتفى.. وسامحنى يا د.أسامة .. مش مستحمل عتاب أو ملامة .. طالما كلامى عليه الزمان عفا .. ولا مسئول اهتم .. ولينا صفا .. ومن مواجعنا .. مالناش .. أمل فى الشفا .. وما دام الكل مدينا عرض القفا.. يبقى العنوان المناسب لكتاباتى ع القفا .. يمكن نصعب على حد .. ويشيل عنا الجفا!