آخر الأخبار
الرئيسية / ع الزراعية / يا سيدي نام وارتاح .. فكل شيئ أصبح مباح!

يا سيدي نام وارتاح .. فكل شيئ أصبح مباح!

بقلم: د.مدحت مراد

فجأة .. وبدون مقدمات .. فكرت فى الزمن اللى فات .. لما كل شيئ كان له أصول .. وفيه قانون محترم وله قبول .. خمسين سنة وانا فى مكانى .. كنا زمايل .. فى زمن تانى .. با تفرج دلوقتى على احوالنا .. بأمانة مش عارف ايه جرالنا .. بقينا عايشين زمن صعب .. كله نفاق .. وهبش ونهب .. استحالة اللى وصلناله .. اللى ما بقى فيه شيئ على حاله .. وها نروح بعيد ليه .. ما كل واحد يلتفت حواليه .. ده كان حالنا قبل 25 خساير؟ آسف .. قصدى 25 يناير .. التاريخ اللى كلكم عارفينه .. الله لا يعيده .. ولا ترجع سنينه!

ليه زمانا بقى شعاره .. نام وارتاح .. فكل شيئ أصبح مباح!

هوه أحنا جبنا شعب تانى؟ والا احنا اللى اتغيرنا فى ثوانى؟

أسوأ ما فينا ظهر وبان .. وبقينا بنندم  ع اللى كان .. عشان كده .. هارجع معاكم كام سنة .. لما كانت أيامنا حلوة .. رغم التعب والضنا  ..  كنا زمايل قلبنا على بعض .. ولا لإيد إتمدت .. حد عض .. دلوقتى المحظوظ .. هو اللى يحوز .. رضا المدير والوكيل .. وبقى  اراجوز!  حا يترقى بدون تعب أو مجهود .. وان حد اتكلم .. يتقاله .. بس يا حقود!

زمان .. كان تعيين مدير المصلحة حكاية .. كان تاريخه مالوش نهاية!

.. إنما فى زمانا الملخبط .. على أد ما تطنطط .. وعلى البيبان تخبط .. البيه ها يحطك فى حسباته .. وها ينوبك من حسناته! حتى لو مادخلتش شغلك سنين .. ولا حد بيشوفك يا حزين!  و فجأة نلاقيك بتتقدم للترقية .. وها تترقى .. لأننا فى زمن المهلبية!.

حاجة تانية مش فاهمها .. الفلاح زمان .. كان بيتعب ويزرع ويكسب .. دلوقتى من غير ما نفكر ونحسب .. على طول الخط بقى خسران .. والتاجر على طول هو الكسبان!

حد يقدر يقولى ليه؟

.. والله انا خايف عليه! ييجى يوم مانلاقيش فلاح فى أرض .. لانه هجر البلد بالطول والعرض..  لإن فيه بين المفروض والحاصل مسافة! .. الناس اللى بتفهم .. بتسميها .. القيمة المضافة. والنهارده حتى الزراعة .. بقى اسمها .. صناعة الزراعة!.

وقبل ما اختم كلامى .. وابعت لكم سلامى .. أحب أبعت ع الهوا رسالة .. وجوابها مافيهوش استحالة .. أرجو إنها تتاخد بجد  ..  وياريت آلآقى لها رد .. للمسئولين فى الحجر الزراعى .. لجل تزودا رد الفعل  المناعى .. راجعوا قوايم الممنوعات الحجرية .. للحفاظ على حالة المصريين الصحية .. وقللوا نسب دخول المسببات المرضية .. لإن فى الكام سنة اللى فاتت .. اتغيرت الحالة المناخية .. وحاجات كتير جت وراحت!  واتمنى ماحدش يطلع يقولى كله تمام .. لان ساعتها ما ها يبقاش بينا سلام .. ودلوقتى أقول لكم .. سلام.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *