رأى

هيثم خيري.. صباح الورد على عشاق السمك

بما إن اليومين دول تقال عالقلب وصعبين جدا، فقلت أخرج معاكم من الجو ده واتكلم في حاجة مفيش خلاف عليها بين عشاق السمك..

فبعد إذن حضراتكم عشاق السمك يركزوا معايا..

اولا أبشركم بأن خليج السويس فتح من عدة أيام، وده حدث لو تعلمون عظييييم..

_ السمك هيرخص اليومين دول، سمك البحر مش المزارع، يعني ابعد عن البوري والبلطي والدنيس والقاروص واللوت، عشان معظمهم مزارع.. وده مش معناه أنه سيء لا قدر الله، انما قصدي لهم حسابات سعر العلف بالأساس والتشغيل وبلاوي زرقا.

_ خش بقي عالكابوريا النتي المبطرخة، والكابوريا الدكر الملحمة الخمسة في الكيلو.

_ المكرونة السويسي متوافرة، وان شاء الله ترخص شوية، وهي مبرومة القوام، رأسها اصغر شوية من غيرها، لونها فاتح عن الدمياطي، ولو رشيت عليها شوية ميه هتلاقيها بتلمع كأنها صاحية.

_ البربرون البلدي الصغير عاد من جديد، بعد اشهر من طرح البربون الاحمر الكبير المستورد، هتلاقيه رخيص وسعره في المتناول أيضا.. كمان ظهر البربون العنبري بتاع البحر الاحمر.. حلو مش وحش خالص زي العسل.

_ الاخطبوط يظهر بقوة هذا العام بالذات مش عارف السبب، وأما تلاقيه برضه هاته، وقطعه جزل من غير ما يتسلخ، وافضل طريقه لأكله المقلي، وسيبك من جو الشيف بوراك والمشوي استيك والكلام ده، وطعمه اقرب للسبيط بس طري اكتر ومفيد جدا للرجال.

_ عشاق السهلية والسردين الموزة هيضطروا يستنوا معانا شوية، الموسم لسة مبدأش أما الجو يسقع، وانصحهم بالتوبارة ٥ و٦ في الكيلو للمزمزة والتسالي الان.

_ طب وفين الجمبري والاستاكوزة يا عم الاكيل؟

حضرتك من نعم ربنا علينا أن الجمبري مش من الاكلات اللي ممكن تأكلها كل يوم، لأنه مليء بمواد غير قابلة للأكل اليومي، وفعلا كترته والطفاسة فيه بتجيب كوليسترول ودهون عالكبد.

وعموما فيه جمبري بلدي وقزاز ظهر في السوق وهيتباع بأسعار أقل من الكام شهر اللي فاتوا.

البلدي إما دمياطي (احمر داكن ورفيع، او رمادي داكن، وانا بقول داكن مش محروق من كتر العرض عالزباين، وبيسموه اليهودي) والقزاز طبعا المشرط بني في وردي (وخدوا بالكم بردو فيه نوع مستورد شبه القزاز مشرط اسود في بني عشان ميتضحكش عليكم).

أما بالنسبة للاستاكوزا فمكلتهاش، ومش ناوي اكلها اصلا، لأنها غالية جدا جدا ونادرة ومفيهاش لحم غير ديلها.. يعني مزاجها ومحبيها ناس عندهم خلل نفسي مش ناس طبيعيين.

_ القشر بياض نيلي بس اخر حلاوة برضه ميتقالش له لأ في كل الاحوال، وسعره نزل شوية.

_ الكوشر لا بأس به ابدا، بس عاوز طباخ جيد أما سنجاري أو مقلي جزل أو صينية بالبطاطس والزيت والدسم بيضرب منها من كل حتة.

_ الكاليماري هيهجم بس هو غالي جدا عشان مش متوفر.

_ الجندوفلي العرايس غاااالي وفيه سرقة ف أوزانه.. وبلح البحر بتاع الفنادق مستورد، سيبكم منه بالجمال كده، لأن الصنف الوحيد اللي موجود في السوق من ٤ سنين يوناني، رتبته قليلة جدا وتصنيفه ضعيف، واتمني أن نستورد بلح البحر التركي الملحم بدلا من اليوناني الهزيل.

_ عشاق السلمون محتاجين يدخلوا جمعية عشان يعرفوا يشتروه، لأنه مرتبط بالدولار وسعره تضاعف بلا ادني مبالغة خلال العشرة أشهر الماضية.. طب وايه العمل؟

اشتروا ماكريل ايسلندي أو هولندي أو نرويجي، التلات مناشيء دول هات منهم وانت مطمئن.. وعيش حياتك مع الاوميجا الخالصة والف هنا وشفا سواء مشوي عالردة أو زيت ولمون أو سنجاري أو صينية أو حتي مشوي زبد زي السلمون.

_ باستثناء الجمبري والاستكاوزا، كل ما ذكر في اعلاه ممكن تشتريه بشوال فلوس، وممكن تشتريه بأقل من ثمن كيلو لحمة.. وانت وشطارتك يا حلو.

تابع الفلاح اليوم علي جوجل نيوز

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى