آخر الأخبار
الرئيسية / ع الزراعية / معاشات الغلابة الضايعين .. مع مجلس نقابة الزراعيين!

معاشات الغلابة الضايعين .. مع مجلس نقابة الزراعيين!

بقلم: د.مدحت مراد

كملت بقى ..!! باللى بيعمله فينا .. مجلس نقابة الزراعيين .. ماهم بهوات مش شقايانين .. اجتماعات كتيرة ومن غير سبب.. وقرارات للبهوات شفنا منها العجب .. وطبعا الاجتماعات .. بنصرف لها بدلات ..  وربنا يزيد ويبارك .. ويابخت مين يشارك .. وأما عن شرب القهوة فحدث ولا حرج! .. كل ربع ساعة فنجان يا فرج.! ماهو كله على حساب الغلابة .. اللى وقعوا فى ايدين الأسود والديابة .. واللى انتخبناهم عشان يجيبوا حقوقنا المنهوبة .. ويزودوا معاشاتنا المنكوبة .. ما شافوش غير روحهم ..  واعتبروها سبوبة لروحهم .. عشرات السنين بندفع الاشتراكات .. عشان ناخد شوية ملاليم بعد العمر ما فات .. يمكن تسند فى الازمات .. وبعد ما بقينا من أرباب المعاشات .. دفعونا تانى الاشتراكات!! و آخر قرارات سيادة الدكتور النقيب .. ومجلسه وسكرتيره الرهيب .. ذو التاريخ والميول المعروفة .. واللى كل أموره مكشوفة .. إن الورثة بعد 10 سنين .. مالهومش معاش  ولا الضالين .. آمين!

ياريت ده يبقى بلاغ للرقابة الإدارية .. يشوفوا الحكاية ديه .. وللجهاز المركزى للمحاسبات .. ييجوا يراجعوا الحسابات .. ويشوفوا ايه حكاية المعاشات .. اللى تتصرف مرة .. ومرة التعلب فات .. وإنت أبوك السقا مات! .. ومصاريف بوفية البهوات .. وأكيد ميعادنا الانتخابات الجاية .. عشان نزيح الأزمة دية! وكلمتى لإخوانى الزراعيين .. إحنا فعلا نستاهل .. مادام فى حقوقنا بنتساهل .. وعاملين ودن من طين والتانية من عجين!.

تعليق واحد

  1. ا.د/ هاني القواص

    بعدما فاض الكيل و اتضح انه لا يحدث تغيير الا بعد حدوث المصيبة فالشكوي لغير الله مزله.. فحسبي الله و نعم الوكيل فيمن ظلم الناس و ادعي جهله. اللهم آمين

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *