كان يا مكان في قديم الزمان

بقلم: د.الحسن محسن بهجت

يجي تيجي متجيش متجيش. استاذي الدكتور علي حسيب استاذ الجراحة في القصر العيني… انا سمعت منه القصة دي اما كنت باخد الكورس عنده وانا في سنه 6 طب….
وكان ملقبنا بالطلبة السيستم
( حكاية الدنيا مع القُرَداتي)

كان في واحد فقييير جداً جــــداً وكان رزقه من شيء واحد بس: أنه كان “قُرداتي ”
كان رزقه اليوم بيومه ..!
ومرة لما كان قاعد مع زوجته وابنه في الخيمة بتاعتهم: زارتهم امرأة شديدة الجمال .. لبسها غالي جدا ً .. ألماظ بقى وكده.
قالها: انتي مين؟ قالتله أنا الدنيا!
قالها: سايباني ليه يا دنيا متبهدل!!
قالتله لأ مَ أنا خلاص قررت أزوركم شوية بس بشرط!
هو: أمرك!
الدنيا: لما أقرر أمشي همشي حـــــاااااااالاً!
هو: زورينا شهر .. أسبوع .. نص ساعة حتى! نفسي أكل بيض بالبسطرمة! نفسي ألبس فردتين شبشب شبه بعض!
المهم خلاص اتفقوا أنها هتزورهم .. وتمشي وقت ما تحب.
يوم ورا يوم .. القُرداتي بقى تاجر كبير .. تاجر أكبر .. لحد ما بقى أغنى واحد في البلد ..!!
ربنا فتح عليه وبقى عنده بدل القصر قصووور ..
وفي وسط الثراء الفاحش ده .. كان مخبي عنده في القصر: القرد, والطبلة, والجلابية المتقطعة, وفردتين الشبشب اللي مش زي بعض
كان محتفظ بيهم عشان يفكر نفسه بنعمة ربنا عليه .. هو كان فين وبقى فين!
المهم يوم كان قاعد في الفراغ وكان عايز يزوج ابنه.
بس ملقاش حد يستاهل ابنه المدلل الا بنت الملك ^^”
راح للملك وطلب ايد بنته لإبنه وطبعاً الملك وافق.
وهيييصة وزيييطة وأفرااااااح لمدة أسبوع في المدينة لأنه الأميرة هتتخطب =))
وآآآن آآآن آآآآن .. جاء اليوم الموعود .. يوم زفاف الأميرة
واجتمعت المدينة والكل مستني … والتاجر الكبير قاعد يسلم على الوزير والملك والكل بيبارك .. قام في حد بيخبط على كتف التاجر بيقوله في واحدة عايزاك في موضوع مهم..!!
قاله مش دلوقتي .. قولها مش فاضي!!
قاله طيب بص بس هي مين
فبص بعييييد لاقاها هي! الدنيا!
اترعب و جرررري جرررررري يشوف هي عايزة ايه! قالها أهلاً أهلاً … أكيد جاية تباركي
قالتله لأ .. أنا جاية أقولك اني ماشية!
قالها يــــاه .. جاية دلوقتي يا دُنيا! سايباني سنين طويلة في النعيم وجاية تمشي دلوقتي! طيب أجوّز الولد وأطمّن على مستقبله وبعدين امشي!
قالتله هو ده الاتفاق اللي كان بيننا! وأنا قررت أمشي وهمشي حااالاً!
قالها طيب استني ساعة.. ساعة واحدة! بصَت بخُبث وقالتله ساعة وهمشي للأبد!
راح هو جررررري القصر بتاعه,, ولبس الجلابية المقطعة .. وفردتين الشبشب .. وطلع القرد والطبلة: D
وقعد ع الأرض وفي وسط الناس: وبدأ العرض بتاعه وبدأ يرقَص القرد ويغني ويقول: “تيجي تيجي .. متجيش متجيش”
يغني تاني ويبصّلها ويقول:
: “تيجي تيجي .. متجيش متجيش”
وهنا وكما تقول الأسطورة وبالدليل القاطع من الكتاب والسنة: أنه الدنيا لما لاقته مش باقي عليها ومش فارق معاه تمشي ولا متشيش: قعدت وممشيتش!
ما زلت أذكر كلمات د.حسيب:
يا حبايبي يا حبايبي “يا سيستم انت وهو وهي” … كل حاجة تخافوا عليها في حياتكم: اشتغلوا عشانها وقطعوا نفسكم في سبيلها .. لكن من جواكم : طلعوا الطبلة والقرد وغنّولها: “تيجي تيجي .. متجيش متجيش”
الدرجات: : اشتغلوا عشانها وقطعوا نفسكم فس سبيلها .. لكن من جواكم: طلعوا الطبلة والقرد وغنّولها : “تيجي تيجي .. متجيش متجيش”
لجنة الشفوي: : اشتغلوا عشانها وقطعوا نفسكم فس سبيلها .. لكن من جواكم: طلعوا الطبلة والقرد وغنّولها: “تيجي تيجي .. متجيش متجيش”
السفر
الجواز
الخلفة
الفلوس
لما تستغنى عن الدنيا من جواك مع الأخذ بجميــــع الأسباب .. ستأتيك حينها وهي راغمة!!
بس لما تسمعها من د على حسيب حاجه تانيه خالص.
ربنا يعزه ويمسيه بالخير

*كاتب المقال: استشارى عظام بمستشفى الهيئة العربية للتصنيع.