آخر الأخبار
الرئيسية / ع الزراعية / زيارة لعم حمدان

زيارة لعم حمدان

بقلم: د.مدحت مراد

فكرت أعمل حاجة ما أتعملتش قبل كده .. ولا حد هايعملها بعد ده! تكون للإرشاد الزراعى إضافة ومدد .. وتبقى نمرة اتنين فى العدد .. بعد زيارتى لخالتى بهانة .. اللى خلتنى حسيت بالمهانة ..قلت أعمل حاجة .. حبايبنا  ليها محتاجة!

من غير لف ودوران .. خدت ابن عمى سليمان ..ورحنا نزور جارى عم حمدان .. يحكى لنا  حواديت من بتاعة زمان .. أيام الجاه والعز والسلطان.  قال لى عم حمدان .. زمانكم ده زمن تعبان!.. فين أيام السمنة البلدى واللبن الرايب .. ولما كان أهل البلد كلهم حبايب! إنتم يا ابنى عيانين وغلابة .. عايشين فى زمن الديابة! زمان كان فيه زراعة ..والفلاح شغال فى غيطه من بدرى بدون لكاعة! .. جرى ايه ياعم حمدان!.. هوه إحنا جايين لك تقطمنا؟ إحنا جايين نسمع منك حاجة تطمنا ..

ماشى ..  قال عم حمدان .. صلوا ع النبى العدنان .. تعرفوا إيه عن القطن أيام زمان؟.. ده هوه اللى كان .. محصول العز والهنا .. دلوقتى شايفين من غيره الضنا .. ماحدش عارف إيه جراله؟ الله يجازى اللى مرمطه وغير حاله! اتدهورت أصنافه .. تاه ولاحد شافه .. ما عدناش بنسمع عنه .. ولا حد بيستفيد منه .. فين القطن طويل التيلة؟ .. خرج مارجعش؟!.. بالذمة دى مش خيبة تقيلة؟ آراضينا زرعناها بيوت .. فين لما كنا نفوت .. على ارض مخليها القطن بتنور .. تلاقيه فى كل حته قدامك .. من غير ماتدور!

يا عم حمدان .. عندك حاجة جديدة قولهالنا .. وما تضيعش وقتنا  .. وعلمنا ازاى نعيده لمجده .. وما تكبرش همنا .. اسمع يا ابنى انت وهوه .. هاتوا لى الدفتر من جوه .. وتعالوا احكى لكم عن زراعة القطن فى الأراضى الجديدة .. قبل ما تبقم على الحديدة!

ميزة الارض الرملية سهولة خدمتها وعزيقها سهل .. كمان تهويتها بتخلى النبات يمص العناصر على المهل .. بس عيبها ما بتثبتس العناصر الغذائية .. يبقى لازم نضيف لها أسمدة عضوية  .. كمان حرثها يبقى سطحى .. مايزدش عن 10 سنتى ..ونحرتها حرته واحدة  ونزحفها بزحافة تقيلة .. ونقصر فترات الرى ونرويها بكميات قليلة  .. وده يتم فى الصبح بدرى أو وقت الغروب .. عشان مانديش فرصة للرطوبة للهروب .. كمان نصغر مساحة الحوض ويكون الرى ع الحامى .. وربك بعد كده هوه الحامى  .. والافضل نرويها بالتنقيط .. أصلها مش محتاجة تنطيط عشان نوفر الميه ..ونزود الزراعة فى الارض الصحراوية .. ولازم نراعى المسافة بين النقاطات والخراطيم .. وانت كمان لازم تكون عليم .. إن  عدد النباتات من 4 – 5 بذور  فى الجورة.. سامعة يا بنت يا أمورة؟ يعنى مهياش ع الكيف! سامع انت كمان يا أخ سيف .. عشان هما اللى  بيتحكموا فى الكثافة النباتية واوعى تنسى معاملة البذور بـالمطهرات الفطرية زي ماقال كتاب التوصيات .. بالموصى بيه من المعدلات .. مش بالاحلام والامنيات .. كما إن جذور القطن عشان كبيرة استفادتها من الميه بتوصل 90% يعنى كتيرة.

طب يا عم حمدان ها نزرع أى أصناف .. من غير ما نقلق أو نخاف؟  لا .. خلوا بالكم كويس .. كل منطقة وليها أصنافها .. زي ما كل شغلانة ليها  ريس ..  والا إيه؟.

والتقاوى لازم تكون .. متجابة من مكان مضمون .. اما انها تقاوى عادية أو منزوعة الزغب .. عشان تديك نباتات قوية ومحصول عجب!  بنستعمل 25 كيلو للفدان  .. وربنا يحفظهم م الديدان .. والارض لازم  تتخطط على بعد 80 – 100 سم وتزرع على الريشتين قدام النقاطات اللى بنخلى  40 سم بين كل اتنين  وعلى عمق  2 – 3 سم .. بعيد عن النقاط  بحوالى 15 سم  بعد نقع البذور فى المية قبل الزراعة .. ونروى بعد كده من 2 – 4 ساعة ونروى بعد كده بنفس النظام .. يوميا لمدة من 3 – أيام!  بعد كده نقلل الرى ساعة يوميا لحين تكشف البادرات  ثم نرقع ببذرة منقوعة من 12 – 18  ساعة من غير دلع ولا لكاعة ..! ونروى الارض وبكده يكون عدد النباتات 70 ألف نبات يتربوا فى عزك يا ست جمالات!

دى باين عليها حكاية ملهاش آخر ياعم حمدان !  أوعى يكون آخرتها تعب وآحزان .. أبدا .. انتوا اللى واخدين الحكاية هزار .. ماهو مفيش حلاوة من غير نار .. لازم الصبر وعزيمة الرجال. وربنا يبارك و يكفينا شر الاستسهال. خلاص  كمل ياعم حمدان ..نصلى ع النبى العدنان .. بعد ظهور الورقة الحقيقية التانية نخف الجورة على نباتين .. ونسمد مع مية الرى .. عشان يبان على النباتات ضى .. ونستخدم اسمدة سهلة الذوبان عشان ما نسدش النقاطات..  ونعرف نغذى النباتات .. واوعوا تهملوا التوصيات .. نستعمل الأمونيوم فى صورة النترا ت والسلفات.. ولازم تراعوا المعدلات .. مع سلفات البوتاسيوم وحمض الفوسفوريك من 5 – 6 دفعات .. عشان فى الأراضى الجديدة بتزيد الكميات .. وبنضيف من 90 – 120 وحدة أزوت .. تخلى النبات يقوى ويفط .. و50 وحدة بوتاسيوم  و5, 22 وحدة فوسفات للفدان .. عشان النباتات ترعرع وتبان. بعد كده نكافح الآفات والحشايش فى المكان .. عشان مانقولش ياريت اللى جرى ماكان .. كفاية عليك كده .. أنا حاسس انك تعبان .. متشكرين جدا يا عم حمدان.

تعليق واحد

  1. الله الله عليك نورت ياقطن النيل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *