آخر الأخبار
الرئيسية / الأجندة الزراعية / زراعة القمح تحت نظام الرى المحورى

زراعة القمح تحت نظام الرى المحورى

م.صابر عبدالرحمن

كتب: صابر عبدالرحمن يعتبر القمح زراعة ابائنا واجدادنا .. فى المعابد المصرية القديمة اكتشفوا وجود حبات القمح فى المقابر … وضعوها قدمائنا المصريين فى مقابرهم وحافظوا عليها .. ولابد أن نحافظ على قدرتنا وسمعتنا وتاريخنا ونظل مستمرين ومتألقين فى زراعة قمحنا وتوفير غذائنا ..

إعداد الأرض..
1- اعطاء ريات غزيرة عن طريق دورات بطيئة لجهاز الرى.
2- خليك شاطر وإعمل عمود مياه جيد طولة 70 سم لو استطعت.
3- احسب المحصول السابق خذ قرارك أحرث ولا تقلب التربه؟
4- فى حالة الحرث .. اعطى وش فك 9 سلاح وضع الاسمدة التالية إعتمادا على تحليل التربة ..
ـ 50 كيلو سلفات نشادر.
ـ 25 كيلو سلفات بوتاسيوم محبب.
ـ 100 كيلو سوبر فوسفات محبب.
ـ الكبريت مهم مع أى زرعه حطلك 50 كيلو كبريت زراعى.
إخلطهم وبالبدارة واعمل تلاحم للجرات، وتأكد من تساوى الكميات على سطح الأرض .. ثم إعمل الوش التانى بالمحراث التسعة سلاح.

الصنف..
ـ إختار الصنف اللى يتناسب مع مكانك على الخريطة .. لان الذى يزرع فى العوينات غير الذى يزرع فى المنيا والواحات، ولا مثل الذى يزرع فى الصالحية والنوبارية ووادى النطرون … كل مكان له صنف .. وكل صنف له نظام فى تفريعه ونموه.

التسوية..
حسب نوع الارض وبما ان غالبيتها رملية خليك فى الديسك هاروو ابو رولة .. جيد جدا .. ولو شاطر ضع خلفه زحافة أو ماسورة أو لواطة .. أهم حاجة يكون إتجاه التسوية عمودى على إتجاه وش الحرث التانى .. أو على الاقل بميل زاوية 45 درجة.

الزراعة..
طبعا مواعيد الزراعة تبدأ غالبا أول نوفمبر .. حاول لا تتأخر عن يوم 20 نوفمبر .. فضى نفسك يوم الزراعة وخليك واقف وعينك فى وسط راسك وطبعا أنت مأجر أو تمتلك سطارة .. خلى إتجاه الزراعة بميل على إتجاه التسوية … اظبط عمق الزراعة واضبط الكمية بحيث تنزل 65 كيلو للفدان .. ممكن تزيد شوية وتنقص شوية حسب إيه … ايوة كدة … (الصنف) .. برافو عليك .. تأكد إن شوك السطارة بتردم كويس و لغطا مناسب.

الرى..
اعطى ريتين بعد الزراعة مباشرة ولا تنسى انك من الاول عندك مخزون مياه فى العمود اللى قولنا عليه.

الانبات..
تقريبا هيبقى عندك انبات بعد اسبوع وهيكتمل خلال عشر ايام .. على يوم عشرين .. نزل حوالى 20 كيلو يوريا دفعة تنشيطية ولا تنسى أنك وضعت سلفات نشادر فى الاعداد.

التسميد..
.. من عمر 20 يوم وحتى عمر 80 يوم نزل شيكارة يوريا وشيكارتين نترات نشادر بالبيفوت ودفعه بالبدارة شيكارتين من النترات أيضا.
.. اهتم بنترات الكالسيوم وضع نص شيكارة فى اول 40 يوم ونص شيكارة ماغنسيوم من عمر 40 وحتى 60 يوم.
.. على عمر 60 يوم ضع 15 كيلو سلفات بوتاسيوم ذواب.
.. القمح يحب سلفات الزنك وسلفات المنجنيز، من فضلك ضع 7 كيلو من الاول و5 كيلو من التانى للفدان الواحد.
.. وكمان 5 كيلو كبريتات حديدوز .. وربما سائل يقول هذا كثير.. أقول له إحنا بنزرع فى أرض رملة وفقيرة ..
.. لا تنسى رشة عناصر صغيرة بمعدل 500 جرام للفدان .. وممكن تصل لكيلو.

الحشائش..
حسب الصنف والكثافة وكمية الحشائش قرار رش مبيد الحشائش متوقف علىذلك كله .. اول ما يكون القمح طوله من 15 الى 20 سم رش تذكرة جرانستار للفدان 8 جرام ,, و خليه إختيار أخير ..

الرى خلال الموسم..
إهتم بـالرى جيدا وحتى مرحلة طرد السنابل وتكوين وإمتلاء الحبوب .. إحذر من الرى لو فيه رياح .. قلل الرى فى الايام الاخيرة من بعد عمر 130 يوم وافطم قبل الضم بفترة كافية حتى تمام الجفاف.

الحصاد..
اختار ميعاد الضم بدقة واوعى يعدى احسن القمح يفرط منك وعينك على سائق الكومباين وافحص وراه وفى القش ليكون فيه فقد أو فاقد وخليه ينزل صدر الكومباين حتى تستفيد بالقش وأعطى له اكرامية حتى يحافظ لك على محصولك.

القش..
بعد لما تخلص ضم وحصاد اكبس قشك و إعمله بالات .. الطن فيه بـ800 جنيه ولو مجبتش 2 طن فى الفدان هزعل منك.

تعليق واحد

  1. السلام عليكم \استاذ صابر المحترم ارجو التوضيح اكث عن زراعة المحصول في الاراضي الصحراويه كونا اراضي فقير ه من العناصر الغذائيه ارج التوضيح اكث بالنسبة الى التسميع في مرحلة البذار وشكرا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *