آخر الأخبار
الرئيسية / رأى / جوهر الأسرة لبنة المجتمع

جوهر الأسرة لبنة المجتمع

د.إنجي خيري فايد

بقلم: د.إنجي خيري فايد

أستاذ مساعد بمعهد الإرشاد الزراعي والتنمية الريفية – مركز البحوث الزراعية

السلام عليكم ورحمة الله وبركاته

بدأت مقالي بالسلام والرحمة والبركة التي ادعوا الله ان تعم على بلادنا

في الأمثال يقولك ايه: صباعك اللي واجعك اقطعه، والباب الي يجيلك منه الريح سده واستريح، الأمثلة دي ماجتش من فراغ جت من تجارب وخبرات، وببساطة الامثلة دي عاوزة تقول ان الحاجة الي مش هتأدي وظيفتها هتكون عالة عليك وهتئلمك وتسببلك مشاكل، فانهيها سواء كان صباعك او باب مفتوح مش جايبلك غير الهم فاقفله احسن.

ايه علاقة الكلام دا باه بـعلم الاجتماع ونظرياته، في نظرية في علم الاجتماع اسمها البنائية الوظيفية اه والله زي ما بقولك كدة على رأي الفنانة الجميلة اسعاد يونس.

النظرية دي بتقولك ان المجتمع عبارة عن بناء بيتكون من ابنية اصغر، كل واحد من هذه الابنية له وظيفة.

تعالوا نشوف علاقة الكلام دا بالمنطق كدة والعقل، هو في حد يروح يصرف فلوس قد كدة علشان يبني بناء ملوش لزمة؟! أكيد هيتقال عليه مجنون، بيصرف مصاريف ملهاش لزمة على مبنى لا هو ولا غيره هيستفيد بيه.

طيب امال العقل يقول ايه؟ العقل بيقول ان انا هبني مبنا علشان……، اهي (علشان) دي بقى المهمة واساس اي مبنا بيتبني، علشان اسكن فيه، احس بالامان والسكينة والهدوء والخصوصية، او علشان اعالج فيه الناس، أو اعلم فيه الناس.

كذلك الحياة الاجتماعية من اول لبنة بها وهي الأسرة، البناء الأسري يا ناس له وظيفة اه والله له وظيفة ومش وظيفة واحدة دول اربع وظائف اساسية علشانهم بنبني اسرة.

الأسرة بتتبني علشان تمد حضرتك وحضرتك بالدعم النفسي والاجتماعي والاقتصادي.

ازاي؟

 الأسرة شركة نفسية اجتماعية اقتصادية بين اثنين بتكبر بعد كدة بالأطفال.

كلام زي الفل طيب نرجع لوظائف الأسرة (بتجوز ليه؟)

بتوجز علشان الاقي الاحترام: حد يحترم احتياجاتي الفسيولوجية والنفسية مش يتهكم عليا، يحترم حريتي في اني ارتبط به ولا لا، اكمل معاه ولا لا، ولنا في رسول الله اسوة حسنة حين خير زوجاته بين الإكمال معه في طريق الدعوة وبين الحياة الدنيا وزينتها فيسرحهم سراحا جميلا، الزواج والاكمال في الزواج مش بالعافية.

بتجوز علشان اقالي التقدير: الاقي من يقدر عملي ودوري في حياته وفي حياة المجتمع. ياجماعة قدروا بعض لما مراتك تقدملك حاجة قولها تسلم اديكي شكرا، ولما جوزك يدخل عليك بحلاوة المولد ما تقولهوش مش هو دا الي عوزاه، اشكريه وقدريه.

بتجوز علشان احس بالامان: في حد بيدعمني ويقف في ظهري، لو تألمت او مرضت الاقي الي يمرضني، مش مستنيله على غلطة، مش كل واحد ماسك سكينة للتاني ومتربص به، ونسمع عن ضرب واهانات واحيانا تصل للقتل، علشان الزوج والزوجة والابناء كلهم مخونين بعض.

بتجوز علشان احس بالانتماء: اني منتمية للناس دول ليه دور مهم في حياتهم، وهم ليهم دور مهم في حياتي، الزوج مهم في حياة زوجته وليس مجرد ماكينة سحب، والزوجة مهمة في حياة زوجها وليست مجرد حاجة موجودة وخلاص في البيت ملهاش اي لزمة.

لو الحجات الاربعة الي فاتت الي علشانها بنتجوز موجودة في مجتمعنا هيكون افضل ببناء اسري صحي مكون من افراد اصحاء يخدموا مجتمعهم باخلاص وتفاني، مش مكلكعين ومعقدين وعوزين علاج نفسي.

هنتجنب بالاربع وظائف حوادث الاغتصاب والتحرش، والقتل والخيانة، وستقل نسب الطلاق في مقابل ارتفاع نسب الزواج، ولن يكون هناك تأخر في سن الزواج، لان الفكرة عن الزواج هتتغير ويكون الزواج فيه حاجة حلوة مش شر لابد منه.

واختم مقالي بقوله تعالى في سورة الروم، والذي اغفلنا معناه: “وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ (21).

ربنا بيقولنا انه خلق الزواج من اجل السكن ولن يكون السكن الا بالمودة والرحمة وهذا الغرض من الزواج، هذا وظيفة الزواج، مش بتجوز علشان اهرب من بيت اهلي، او اجيب ابناء ماعرفش اربيهم، افلا تتفكرون؟.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *