آخر الأخبار

السد الإثيوبي.. كلمتين قبل الصدمة

بقلم: هاني إبراهيم

كلمتين قبل الصدمة لو السد استمر بدون اتفاق نهائي يجبر اثيوبيا حرفيا او حصل تخفيض سعته عن المعلن عنها..

مفيش دراسات اتكلمت عن كل اضرار السد، كل الدراسات بتركز على تخفيض كمية المياه وموضوع الزراعة وفعلا الزراعة اكبر متضرر ومش هتكلم عنها هتكلم عن اضرار تانية.

اي سد فى الدنيا بيضم فواقد لكن الكمية بيحددها عوامل كتيرة عندك مثلا طبيعة التربة فى موقع السد الاثيوبي الكارثي ونفاذية الصخور يعني المياه اللى بتتسرب لباطن الارض هل هتوصل لخزان السودان الجوفي قرب الحدود  ولا هو كمان هيتضرر والمياه هتوصل لنطاق تاني فى اثيوبيا.

هل صخور موقع السد الاثيوبي بتضم معادن ممكن تتفاعل مع المياه وتسبب اضرار على جودة المياه اساسا ولا صخور عادية؟

اي سد علشان يضمن يقلل كمية التسرب لباطن الارض لازم يعمل اختبارات على التربة بصورة مبسطة يعني اثيوبيا علشان تعمل ملء للسد بصورة تقلل التسرب من الخزان لازم تعمل ملء ببطىء وليس سريع انها اول عام مثلا 5 مليار متر مكعب فى النطاق اللى بيضم الكمية دي هيحصل ترسيب للطمي انه يكون طبقة عازلة شوية تمنع تسرب المياه وتاني سنة تزود 2 مليار وتالت سنة تزود وهكذا علشان تقلل التسرب لكن اللى بيحصل عكس كده هي عملت اختبارات لكمية 2 مليار 4 سنين وفجأة رفعت سقف التخزين لكميات اكتر وبالتالي حجم التسرب هيكون كبير بدون كلام عن دراسات اثبتت وجود نفاذية عالية فى قطاعات عند منسوب 575 م فوق مستوى سطح البحر يعني بنتكلم عن كمية مياه فى حدود 7 مليار متر مكعب تقدر تقول الكمية اللى اقل تسرب هيكون فيها اما ما بعدها هيزيد حجم التسرب وكل ده اسمه فواقد من اصل كمية ايراد النهر.

معدل البخر فى السد الكارثي فى دراسات بتتكلم عن 3 مليار ودراسات عن 5 مليار متر مكعب سنويا وهيجي واحد يقول اقل من السد العالي فى حين ان كمية 161 مليار متر مكعب فى اعلى تخزين بالسد العالى 10 مليار واقل كمان اما فى سد اثيوبيا بالنسبة والقياس للكمية معناه نسبة بخر اعلى مع ملاحظة ان البخر اساسا فى موقع السد الاثيوبي اعلى من نسبة البخر فى الروصيرص السوداني وممكن مقارنة ارقام بخر خزانات اثيوبيا فى فينشا وجلجل اباي كقياس لمعرفة نسبة البخر فى الهضبة الحبشية.

هل الاضرار بخر وتسرب بس؟ لا فى حاجة اسمها تشرب الصخور يعني الصخور لما بيتم عمل ملء بتمتص كميات من المياه لاول مرة يعني الفاقد هيكون كبير لكن لمرة واحدة! لا للاسف لان زي ما قولت السد هيعمل تفريغ جزئي قبل الفيضان مباشرة وعلى ما يجي الفيضان يحجز تاني والصخور تشرب مياه تانية وفواقد سنوية كتيرة فى الموضوع ده.

جودة المياه ومش هنقول الغطاء النباتي واضراره لكن هنقول نقطة تانية ان خزان السد الكارثي هيضم مياه راكدة فترة طويلة فى السنة لان فيضان النيل الازرق بيكون فى يونيو ويوليو واغسطس وسبتمبر وهنا مصدر المياه الاساسي وبكده اثيوبيا بتحجز المياه لكن ايه اللى يضمن تجديد المياه فى البحيرة غير كمية بسيطة جدا من بحيرة تانا لو اثيوبيا شغلت القناطر عموما وبرضو هتكون كمية اقل من 2% من سعة البحيرة الراكدة وهتوصل لموقع البحيرة من اكتوبر الى مايو يعني عندك 8 شهور مياه شبه راكدة ودي لها اضرار .. الفرق بين السد الكارثي وبين السد العالي ان بحيرة السد العالي بيوصلها مياه من النيل الابيض طول السنة وده بيعمل تجديد للمياه وبالتالي مياه غير راكدة على عكس بحيرة سد اثيوبيا الكارثي. ده لوحده معناه ان محطات مياه الشرب هحتاج تصرف فلوس على تنقية المياه ودي اضرار تانية مش محسوبة فى الدراسات.

الحياه النهرية فى النهر نفسه من اسماك هتتأثر بجودة المياه وانخفاض التدفق وهنا خسارة اقتصادية فى مجال الصيد حتى لو شايف انها ارقام بسيطة لكن بتفرق مع الصيادين البسطاء.

الجسور او الكباري على النيل مع تراجع المنسوب هيحصل فيها هبوط لان بالتبعية المخزون الجوفي تحت قواعد الجسور هيتم السحب منه بكميات كبيرة وده ضرره الاشد هيكون فى السودان على طول النيل الازرق وبعد كده هيطول الكل لان ايراد النيل الازرق لوحده 50 مليار من الـ84 مليار ايراد النهر فى السودان ومصر.

فى اضرار تانية خاصة بـالسياحة كمية المياه لما هتقل بالتبعية منسوب النهر هيقل وبالتبعية هيحصل شحوط فى المراكب سواء نقل نهري او سياحة نهرية وافتكر موضوع الشحوط اللى كان بيحصل فى السد الشتوية معروف لناس كتيرة يعني فى اضرار على النقل النهر من ناحية وعلى السياحة النهرية كمان هتقولي السد العالي موجود وهينظم ده لكن الاجابة ان السد العالي بعد تشغيل سد الكارثة الاثيوبي هيفقد بالتبعية كتير من مهامه لغاية مرحلة التوقف تماما عن العمل طالما مفيش اتفاق ينظم التدفقات بين سد الكارثة والسد العالي خلال الجفاف.

هل تقدر تجبر اثيوبيا انها تخفض سعة السد او تعمل اتفاق يجبرها على الالتزام؟

نقطة ضعف اثيوبيا انك تحاصرها اقتصاديا:

ـ سحب الاستثمارات المصرية فورا وتوجيها الى السودان.

ـ رفع دعاوي تحكيم دولي بخصوص تضرر الشركات المصرية خلال ازمة التيجراي واي احكام تصدر ولو بمبالغ بسيطة يتم بيعها للشركات الدولية المتخصصة هيعرض اثيوبيا للافلاس الحرفي.

ـ اعتبار سد النهضة بالنهج الاثيوبي الحالي اجراء عدائي يستلزم:

*وقف تصاريح مرور شركة الطيران الاثيوبية لاعتبارات امنية “لو فاكرين واقعة شركة العال وكاميرات فى الطائرات اي نعم احنا فى عصر الاقمار الاصطناعية لكن اكيد فى مبررات ” .

*تضييق على الوكيل الملاحي “الهولندي”  للحكومة الاثيوبية ماعدا ناقلات القمح او الاغذية.

*دراسة المادة 51 من ميثاق الامم المتحدة التى تتيح لاي دولة اتخاذ ما تراه من اعمال تضمن الدفاع عن نفسها اذا اعتدت قوة مسلحة عليها وابلاغ مجلس الامن بعدها” وتعريف الاعتداء هنا مش شرط عملية عسكرية من تلك القوة ضدنا ممكن التخطيط او انتهاج امر من شأنه المساس بالامن القومي”.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *