أخي المزارع.. خلي بالك من انخفاضات إضافية في حرارة الليل وانكسار الحرارة نهاراً

كتب: د.محمد فهيم بدأنا فترة مناخية جديدة ومغايرة تماماً تستدعي التركيز جداً، ولأول مرة يجي خريف مستقل بحالة بعيد عن سيطرة الصيف المتجبر. يعني رجعنا 40 سنة لورا (ما قبل تغير المناخ). يعني كل الممارسات الزراعية اللى اتغيرت (بسبب تغير المناخ) محتاجة تتغير تاني.

تابعونا على قناة الفلاح اليوم

تابعونا على صفحة الفلاح اليوم على فيس بوك

بداية من الأسبوع المقبل، فيه انخفاضات إضافية في حرارة الليل وكمان مزيد من انكسار الحرارة نهاراً … وده يعتبر حاجة إيجابية جدا لكتير من المحاصيل، خاصة اللى في اخر عمرها زي البطاطس البدري، والبصل المقور، والفاصوليا البيضا وحتى البنجر العروة الاولى والتوم البدري.

لكن برده ايجابي لكتير من الأمراض زي الانثراكنوز على المانجو والفاصوليا والفراولة وكمان ظروف مناسبة جداً للندوة المتأخرة على البطاطس والعفن الابيض على الفاصوليا والتبقع السركسبوري والالترناري على البسلة.

يعني انت محتاج رشات وقائية ضروري جداً خاصة قبل الري مباشرة بالمواد الفعالة مفينوكسام وازوكسي استروبين ومانكوزيب ومركبات النحاس لو مفيش تزهير.

أما المحاصيل في بداية عمرها زي البطاطس الشتوي والفراولة والطماطم في الصعيد والبصل السبعيني في سوهاج فلازم تتوصى قوي بمركبات الفسفور في صورة ماب أو حامض فسفوريك بالتبادل مع نترات الكالسيوم .. ده طبعا ملوش علاقة ببرنامج التسميد الطبيعي.

واخيرا، الأجواء هتساعد كتير في بداية زراعة محاصيل الموسم الطويل زي القمح والفول وكل الطبية العطرية زي الكمون والشمر واليانسون وغيرها .. ومن غير ما تخاف من تجاوز مراحل النمو.

*المادة العلمية: رئيس مركز معلومات تغير المناخ بمركز البحوث الزراعية.